رويدا بطلة، عمرها 14 عامًا، تتحدى سرطان العظم بشجاعة وروح معنوية مرتفعة، دخلت 57357 منذ عام وخمسة شهور، وتم تشخيصها بالإصابة بسرطان العظم فى كعب القدم اليمنى، وتم إجراء جراحة لها، واستئصال الورم، ثم خضعت لجرعات علاج كيماوى، وأنهت كل الجلسات، وبدأت فى المتابعة .
والدة رويدا: “مهما عملت مش هاقدر أرد جميل مستشفى 57357، اللى أنقذوا حياة بنتى، وقدموا لها أفضل رعاية وعلاج، وكمان رعاية نفسية فى أصعب الأوقات فى رحلة علاجها، وهى أوقات جرعات الكيماوى، وبعد العملية، الدكاترة خاصة طبيبها الاستشارى د. محمد عبدالرحمن والتمريض، وكل الناس اللى فى الورشة، يرجع لهم الفضل فى تشجيع رويدا ومساعدتها فى التغلب على خوفها ومساعدتها كمان فى المذاكرة والامتحان فى 57357 ، ونجحت وعوضت السنة اللى انقطعت فيها عن المدرسة بسبب المرض وإن شاء الله تحقق حلمها وتبقى دكتورة”.
روايدا: “أنا فرحانة إنى باحتفل بعيد ميلادى النهارده مع ماما فى بيتنا، وأتمنى فى السنة الجديدة ربنا يشفينى، ويشفى كل أصحابى اللى فى 57357، أنا قبل ما أتعب كنت بالعب باليه، ولكن بعد المرض توقفت لكن عندى أمل كبير إنى أرجع تانى ألعب باليه، أنا بحب المستشفى قوى خاصةميس أمانى فى ورشة العلاج بالفن، لأنها فى أصعب أوقات العلاج بتاعتى أدتنى ثقة كبيرة وشجعتنى إنى ما أخافش من الكيماوى لدرجة أنى كنت باروح الورشة، وأنا معلقة الكيماوى أرسم وألون وألعب معاهم” .
شكرًا لكل أهل الخير اللى بيدعموا ولادنا.. تبرعكم بيفرق فى حياتهم وبدعمكم أطفال 57357 بيكملوا مشوار علاجهم، وبيحققوا حلمهم فى الشفاء من السرطان.