فرحة العيد فى عيون كريم وعمر أبطال 57357

    كريم، 12 سنة، وعمر 9 سنوات، من الشرقية، بطلان إخوات من 57357، بيحاربوا المرض بشجاعة، علشان يحققوا حلمهم فى الشفاء، وأحلامهم لما يكبروا..

كريم، 12 سنة، وعمر 9 سنوات، من الشرقية، بطلان إخوات من 57357، بيحاربوا المرض بشجاعة، علشان يحققوا حلمهم فى الشفاء، وأحلامهم لما يكبروا، كريم بيتمنى يكون لاعب كرة مشهور، وعمر بيتمنى يطلع دكتور، مستشفى 57357 بالنسبة لهم بيتهم الثانى، بيلعبوا ويرسموا فى الورشة وسط أصحابهم من أبطال 57357، وبيكملوا علاجهم ومش خايفين، هايقضوا العيد فى البيت وعاملين خطة للفسح مع أصحابهم.

تقول والدة كريم وعمر: “إحنا بنحمد ربنا إنه بعت لنا ناس زى دكاترة 57357، حسسونا إن فيه أمل، وطمنوا قلبى على ولادى، وبيبذلوا أقصى جهدهم لراحة كل الأطفال، مرض أولادى الاتنين كافى إنه يدمر نفسية أى حد، ولكن رحمة ربنا واسعة رزقنى بناس، قالوا لى روحى 57357 كريم، هو اللى تعب الأول فى بداية 2018 دخل المستشفى، واتشخص سرطان فى العظم فى مفصل الركبة، أخد كيماوى، وجسمه استجاب الحمدلله، واتحجم الورم وعمل عملية استئصال وركب مفصل وكمل علاجه ودخل متابعة 3 سنين، لكن اكتشفوا فى 57357 بعد السنة الثالثة فى المتابعة أن المرض اتنقل للرئة اليمنى، وتم عمل استئصال لنص الرئة اليمنى وأخد كيماوى وإشعاعى، وهو حاليًا فى المتابعة، المستشفى عملت بفضل ربنا معجزة ولادى لأن الرعاية النفسية اللى قدموها لكريم وعمر، ساعدتهم ينسوا تعبهم ويركزوا على أحلامهم لما يكبروا زى أى أطفال فى سنهم، كريم فنان بيحب الرسم، وله لوحات متعلقة فى ورشة العلاج بالفن، وبيحب يلعب كورة قدم”.
وتضيف والدة كريم: “أما عمر اكتشفنا مرضه فى شهر 8 سنة 2019، ودخل 57357 مع أخوه واتشخص سرطان فى الغدد الليمفاوية، أخد علاج كيماوى وإشعاعى، وبدأ متابعة من شهر 12 سنة 2021 للآن، عمر مختلف عن كريم، لأنه هادى، وبيصوم رمضان كله، ودايمًا يدعى يارب أشفينى وأشفى أخويا وأشفى كل مريض”.

لأنك واقف جنبهم كريم وعمر رغم تحدى المرض اللى بيواجهوه بيكملوا رحلة علاجهم وشفائهم من السرطان وهايقضوا العيد مع أسرتهم وهايفرحوا مع أصحابهم، شكرًا لكل قلب بيدعم رحلة علاج أطفال 57357 وبكريم عطائه بيمنح فرصة وأمل لهم فى الشفاء من السرطان والعودة لحياتهم زى باقى الأطفال فى سنهم.

عيد سعيد على كريم وعمر وكل أطفال 57357، وعلى كل شركائنا فى الخير.