فيفيان، واحدة من أبطالنا فى 57357، عمرها الآن 15 سنة، من محافظة سوهاج، تحارب سرطان العظم لثانى مرة، فى المرة الأولى، دخلت المستشفى فى نهاية 2017 مصابة بسرطان العظم فى الظهر، واتمت علاجها، وتحسنت حالتها، وانتقلت لمرحلة المتابعة، وبعد أكثر من عامين ارتد عليها المرض مرة أخرى منذ خمسة أشهر فى الساق اليسرى، وهى الآن تتلقى جرعات الكيماوى فى رحلة علاجها الثانية.
عندما تتحدث مع فيفيان، ترى البسمة لا تفارق وجهها الجميل، حتى وهى تتلقى جرعة الكيماو، قالت عن 57357: “المستشفى أصبحت بيتى الثانى، بحب كل الناس هنا، خاصة دكتور أحمد كامل، دايمًا يدينى أمل، وباطمن من كلامه، وبقيت مش خايفة لأنى واثقة فى ربنا، وعارفة أن كل حاجة ليها علاج، وأنا زى ما انتصرت بفضل ربنا على المرض أول مرة، هانتصر المرة دى إن شاء الله، باقول لكل طفل لسه بيبدأ رحلة علاجه فى 57357 ما تخافش ولازم تاخد علاجك علشان تخف وترجع لحياتك”.
وعن أمنية فيفيان، قالت: “قبل التعب مكنتش بافكر فى مستقبلى أو عاوزة أبقى إيه لما أكبر، ولكن محنة المرض غيرت لى حياتى، وبعد اللى شوفته فى الرعاية والاهتمام هنا فى المستشفى، أصبح لى حلم .. نفسى يتحقق بعد الشفاء، وهو إنى أبقى دكتورة أعالج الأطفال زى ما بيعالجونى هنا فى 57357، وأبقى عندى شجاعة أكتر وإصرار على الشفاء بإذن الله”.
أطفالنا فى 57357 أبطال بيتحدوا المرض، وكلهم أمل فى الشفاء، وبمساعدتكم بيكملوا مشوار علاجهم .. تبرعك مهما كانت قيمته هايساعدنا ننقذ حياة طفل، وينتصر على السرطان.
مستشفى 57357 رحلة علم .. هدفها الحياة
