نور بطلة من 57357 تتحدى سرطان الكلى بضحكتها الجميلة وأمنيتها تكون دكتورة

    بطلتنا نور، من الزقازيق، محافظة الشرقية، عمرها 4 سنوات و8شهور، دخلت 57357 فى مايو 2022، وتم التشخيص بإصابتها بورم سرطانى فى الكلى اليسرى..

بطلتنا نور، من الزقازيق، محافظة الشرقية، عمرها 4 سنوات و8شهور، دخلت 57357 فى مايو 2022، وتم التشخيص بإصابتها بورم سرطانى فى الكلى اليسرى،تم عمل استئصال للورم، والآن نور تتلقى جرعات الكيماوى، بطلتنا بتكمل مشوار علاجها وبضحكتها الجميلة بتتحدى كل الأيام الصعبة.
تقول والدة نور: “اكتشفنا الورم عند نور بالصدفة، ورحنا بيها فورا لـ57357، لأنها أحسن مستشفى بتعالج سرطان الأطفال، وأخدنا دورنا، ولما دخلنا عملوا لهاأشعات وتحاليل تانى، وعملت العملية تانى يوم على طول والاستشارى د. محمد عبد الرحمن، طمن قلبى إنه إن شاء الله نور هاتتحسن، ونسبة شفائها مطمئنة، الاهتمام اللى شوفته هنا من الدكاترة والتمريض حسسونى إن بنتى فى أمان، وطمنوا قلبى عليها، الناس فى المستشفى هنا بيبذلوا مجهود كبير جدًا فى رعاية ولادنا، وكل دا مجانًا، ياريت كل أم، وكل أب يتبرعوا علشان المستشفى دى تستحق، لأنها بتعالج كل الأطفال اللى عددهم بقى كبير جدًا، لازم كلنا نقف معاهم، وأنا أولهم وكل أسرتى،وباقول لأى أم ابنها أو بنتها لسه داخلين، إطمنى علشان 57357 بيبذلوا جهود جبارة لإنقاذ حياة ولادنا، ربنا يحفظ ولادنا ويحفظ 57357 “.
وبالحديث مع نور، قالت: “أنا نفسى أطلع دكتورة واشتريت البالطو الأبيض، وأول حاجة هاعملها هاجى هنا، وأدى الأطفال حقن المناعة زى ما باخدها،وهاقولهم ما يخافوش، أنا بحب المتطوعين قوى علشان بيزورونى،وأنا باخد الجرعة، وبيكونوا لابسين لبس البلياتشو والبهلوانات وبالعب معاهم، وعلى فكرة أنا كمان شاطرة قوى، ولما برجع البيت باطبخ مع ماما الأكل فى المطبخ الصغير بتاعى”.

بدعمك وتبرعك هاتدوم ضحكة نور وزيها كتير من أطفال 57357 اللى بيتحدوا سرطان الكلى، وهايحققوا حلمهم فى الشفاء بإذن الله.