١٣ سنة واحنا ناجحين ومكملين ببركة الله وفضله وبجهد الناس اللى متعرفش المستحيل.
وبفضل شركائنا من أهل الخير اللى بيساندوا المستشفى رغم كل الظروف، شركاؤنا من كل الفئات، اللى أثبتوا أن أهل الكرم والعطاء مش بس من الأغنياء، لأن النسبة الأكبر من التبرعات اللى أنشأت 57357 كان أساسها تبرعات البسطاء والطلاب والأطفال، اللى لسه بيساندونا بكل الحب والثقة.
١٣ سنة مخلصين لوجه الله علشان ولادنا وبلدنا، لكن الـ ١٣ سنة كان قبلهم رحلة كفاح عمرها أكثر من ٣٠ عامًا.. رحلة أساسها عمل مخلص من مؤسسين آمنوا بالحلم وساندوه بكل الحب.. ولسه بيواصلوا كفاحهم مع أحلام التوسعات الجديدة.
ومن البداية، كان هدفنا الأول هو سعادة أطفالنا، وكانت رؤيتنا القضاء على السرطان، وتحقيق حلم الطفولة بلا سرطان، ومن أول يوم اعتمدنا على التعليم والبحث العلمى وجودة الرعاية الصحية لكل الأطفال مجانًا وبعدالة كاملة، والحمد لله لسه مكملين بنجاح وكل يوم بنطور ونوسع.
شكرًا لكل واحد وقف معانا وساعد بإمكانياته وتبرعاته وبوقته وجهده وحبه ودعواته.
وكل سنة و٥٧٣٥٧ دايما بخير ونجاح وتطور.. وكل سنة واحنا بنكبر ونتوسع بيكم وليكم.