الطلاب : تصميماتنا تعكس حبنا لـ 57357.. وفخورون بالمشاركة فى الحلم الجديد حلم جديد بيخرج للنور، توسعات جديدة بتتبنى بإيدين ولاد مصر، وقلوب كتيرة بتشاركنا الفرحة بحلم هايوفر لكل طفل مريض مكانًا وعلاجًا على أعلى
مستوى، وشباب مصر الجدعان دائمًا مشاركين فى الخير، علشان ولادنا فى
57357. كل واحد بيشارك بطريقته، ومن خلال مبادرة “إحلم.. إرسم.. لوّن”، التى أطلقها قسم الجامعات المصرية بمؤسسة مستشفى 57357، رحب وتسابق طلاب الكليات الفنية للمشاركة فى تلوين السور المحيط بأرض التوسعات الجديدة لمستشفى 57357، والتى تضم مبنى بـ 300 سرير جديد، ومبنى للبحث العلمى،
ومبنى جديدًا للعيادات. وعلى مدى ستة أشهر، تم عمل العديد من ورش العمل مع الطلاب، لاختيار أفضل
التصميمات التى يُمكن تنفيذها، ويشارك فى المبادرة 200 طالب من كليات مختلفة، مثل: فنون تطبيقية جامعة حلوان، وفنون تطبيقية جامعة بنها، وتربية فنية جامعة حلوان، وتربية فنية جامعة المنيا، وتم عمل 50 تصميمًا
مختلفًا.. التصميمات مستوحاة من تصميم ورؤية المستشفى، وتضم البحث العلمى، والرعاية النفسية، والمساواة بين كل الأطفال، إلى جانب الشخصيات المؤثرة فى المستشفى منذ إنشائه مثل الحاجة زهرة، أيقونة 57357، التى تبرعت بخمسة جنيهات عند الافتتاح منذ عشر سنوات، والسيدة علا غبور، و أ.د. رضا حمزة، وغيرهم ممن كانت بصمتهم نورا ونافذة الأمل لأطفالنا فى رحلة علاجهم من السرطان.
والجدير بالذكر أن المبادرة تمت برعاية شركة كابسى، التى وفرت الدهانات وبمشاركة شركة ريتش بيك، التى وفرت وجبات للمشاركين. وفى لقاءات مع طلاب الجامعات أثناء تلوين السور تقول نورهان محمد،
الفرقة الثانية، كلية فنون تطبيقية جامعة حلوان: “التصميمات كلها مستوحاة من روح المستشفى بألوان جميلة، تساعد المرضى على الشعور بالبهجة، رسمنا مدرسة 57357، وأحلام المرضى، والبحث العلمى.. أنا سعيدة أنى بأشارك ولو
بشىء بسيط فى التوسعات الجديدة”. آية مراد، الفرقة الخامسة، تربية فنية جامعة المنيا: “إحنا بنعمل 127
باكية فيها ألوان للأطفال بتوصف معاناتهم مع المرض، والفرحة اللى بتدخل قلبهم لما بينتصروا على السرطان.. ربنا يسهل والتوسعات تنتهى بسرعة، فخورة أنى بأشارك فى تلوين السور مع طلاب خمس كليات”. فنانون وإعلاميون يشاركون فى تلوين سور توسعات 57357: وكعادتهم فى المشاركة دائما فى كل نشاط يدعم أطفالنا، لم يتأخر فنانونا
وإعلاميونا عن المشاركة فى تلوين سور التوسعات مع طلاب الكليات الفنية، وفى بعض اللقاءات معهم، كانت هذه كلماتهم : الإعلامى أحمد سالم: “أجمل ما فى 57357 أنها بدأت بحلم اتحول لفكرة..
اتحولت لأكبر مشروع خيرى فى الشرق الأوسط.. علشان كده كان لازم نحلم ونرسم ونلون سور المشروع الجديد.. تعالوا نحلم مع بعض.. مع مبادرة احلم ارسم لوّن.. أجمل مبادرة فى الدنيا مع شباب جامعات مصر”.
الفنانة رشا مهدى: “أنا النهاردة جاية أشارك طلاب الكليات الفنية فى مبادرة “احلم.. ارسم.. لون”، علشان نكمل الحلم الجديد لـ 57357 بـ 300 سرير لأطفالنا، علشان مانقولش لطفل مالكش مكان”.
الإعلامية سالى فؤاد: قبل كده حققنا حلم 57357 والنهاردة بمبادرة احلم ارسم لون، هانشارك فى تحقيق حلم جديد بـ 300 سرير، علشان أطفال كتير تتعالج وتخف، وباتمنى مستقبل أحسن وكله خير لبلدنا”. الإعلامى مراد مكرم: “احلم.. ارسم.. لون”، هانكمل معاهم حلم جديد لـ 57357 بـ 300 سرير جديد ، حاجة تشرف وتفرح أن الواحد يبقى جزء من التجربة دى.. أنا مع طلاب جامعات مصر جامعة بنها وجامعة المنيا وحتى لو دورى هو التلوين فقط إلا أنه مشاركة فى بناء حلم لمصر.. شارك بفلوسك أو بمجهودك أو اتبرع بالتلوين.. اعمل حاجة تدخل البهجة على قلوب كتير محتاجالك..
وشارك فى حلم 57357 الجديد. كما شارك أيضا من الفنانين الفنانة أروى جودة، والفنان هشام ماجد، والفنان محمد شاهين.
مع كل حلم لـ 57357، بيكون دائمًا طلبة مصر ليهم بصمة خير كبيرة وجميلة، بنشوف شباب مصرى جميل بيشارك باللى يقدر عليه.. علشان يسعد أطفالنا المرضى، والكل بيتسابق للمشاركة.. فنانين ورجال أعمال جدعان بيحبوا مصر وولادها ودايمًا واقفين جنبها علشان ولادنا يتعالجوا بأفضل رعاية صحية وبالمجان.. ويكونوا سندا ومستقبلا مشرقا لأم الدنيا بإذن الله. شكرًا لكل طلاب الكليات الفنية اللى بيشاركوا فى تلوين سور التوسعات.. وشكرًا للفنانين والإعلاميين اللى أصروا على أن تكون لهم بصمة فى هذا المكان.. وشكرًا لشركة كابسى على دعمها الذى لا يتوقف لأطفال 57357.
57357 دائما بتجمع كل المصريين فى الخير
مستشفى 57357.. رحلة علم هدفها الحياة
