سلوى بطلة من 57357: هزمت السرطان وهشترى من مصروفى هدية عيد الأم

    والدة سلوى: 57357 نعمة كبيرة لينا ولولادنا

    حدثتنا والدة سلوى عن رحلة شفاء سلوى من السرطان فى 57357، قالت: “احنا من بنى سويف وسلوى بنتى، 7 سنين، هى البنت الوحيدة على 4 أولاد، كنت باتمنى يبقى عندى بنت وفرحت بيها لما اتولدت.

والدة سلوى: 57357 نعمة كبيرة لينا ولولادنا

حدثتنا والدة سلوى عن رحلة شفاء سلوى من السرطان فى 57357، قالت: “احنا من بنى سويف وسلوى بنتى، 7 سنين، هى البنت الوحيدة على 4 أولاد،  كنت باتمنى يبقى عندى بنت وفرحت بيها لما اتولدت، ولما بقى عندها 5 سنين فجأة جالها وجع فى رجلها وزاد ومبقتش قادرة تتحرك جرينا على الدكاترة وحسرتى كانت كبيرة لما قالوا عندها سرطان كنت حاسة أن الدنيا أسودت فى وشى وكل اللى عاوزاه حد ينقذ حياة بنتى  .

حولونى على 57357 ، وأخدت دورى ودخلنا الحمدلله وقابلنا دكتور عمر شوقى وبعد الأشعات والتحاليل اكتشفوا ان عندها سرطان فى عظم الحوض والأعصاب لكن فى المستشفى طمنونى، وبدأوا العلاج الكيماوى وفعلًا مع أول جرعة سلوى بدأت  تتحسن وضحكتها رجعت ولما انتهت جلسات الكيماوى والإشعاعى اتحسنت سلوى أكتر وآخر تحاليل كانت كويسة وانتهى علاجها كله على خير الحمدلله وبقى لنا سنة فى فترة متابعة”.

وتستكمل والدة سلوى: مش لاقية كلام أوصف به المستشفى والدكاترة والتمريض اللى كانوا طوق نجاة ، وبفضل ربنا أنقذوا حياة بنتى حبيبتى برعاية زى بلاد بره ويمكن أحسن وكلها بالمجان حتى لما أسنانها تأثرت بالعلاج عالجوها فى المستشفى فى عيادة الأسنان، المستشفى فيها عيادات لكل التخصصات اللى ممكن تحتاجها سلوى، انا فى ٥٧٣٥٧ باحس ان سلوى بنتهم مش بنتى أنا بس.. 57357 دى نعمة كبيرة لازم نحافظ عليها ونساعدهم قد ما نقدر علشان يكملوا وينقذوا حياة أطفال أكتر.. ربنا يبارك لنا فى 57357 ويقويهم”.

وتقول سلوى:

ماما بتتعب معايا أوى، وأنا عاملة لها مفاجأة وباحوش من مصروفى وهاجيب لها طرحة حلوة فى عيد الأم، ونفسى لما أكبر أطلع دكتورة أسنان زى دكتور محمد اللى فى 57357 واللى دايمًا يقولى أنتى شاطرة ومش بتخافى  وكمان بحب عمو أيمن اللى بيصورنى مع ماما ومع صاحبتى رؤى صور جميلة.. أنا بحب 57357 قوى وباقول لكل أصحابى اللى فيها ربنا يشفيكم.

أبطال 57357 مش بس أطفالنا ولكن أمهاتهم كمان أبطال اتحملوا كتير ،  ووقفوا ورا ولادهم بالتزامهم بتعليمات الأطباء اللى كان له دور كبير بعد ربنا فى شفاء أطفالهم.. ربنا يحفظ كل الأمهات ويشفى أطفالنا فى 57357.

وكل سنة وست الحبايب فى كل مكان بخير

فرح ست الحبايب فى عيدها واتبرع باسمها فى 57357 هاتكون سبب فى شفاء طفل وفرحة قلب أم وثوابك هايدوم بركة فى حياتك بإذن الله