جورج جمال، واحد من أبطال كتير من ولادنا فى 57357، عنده تسع سنوات ونصف السنة، فى الصف الرابع الابتدائى، دخل المستشفى وعنده 7 سنوات، يعانى من ورم فى الخلايا العصبية فى البطن، كانت رحلة علاجه صعبة شملت جرعات كيماوى، ثم عملية استئصال للورم، وبعدها أجرى عملية زرع نخاع ذاتى، وقضى فى العزل 28 يومًا هو ووالده فى المستشفى، رحلة علاج استمرت سنتين ونصف، حارب فيها جورج السرطان بمنتهى الشجاعة والصبر والرضا، وفى شهر نوفمبر 2019 أخبره الطبيب المعالج فى 57357 أن التحاليل كلها جيدة الحمد لله، وأن فترة العلاج انتهت على خير وهو بصحة جيدة الآن، وبدأ فترة متابعة فى عيادة الزرع .
يحكى والد جورج عن تلك الفترة : حينما بدأ ابنى يشكو من الام شديدة، ، عملنا أشعات وتحاليل، وفوجئت بالطبيب يخبرنى بوجود ورم، و يقول لى “خد ابنك وروح بسرعة على 57357 دى أحسن مستشفى لأورام الأطفال بشهادة العالم”،
بصراحة شعرت بالقلق وكنت خايف ما نتقبلش، ولكنى قدمت كل الأوراق المطلوبة وتانى يوم كلمونى، وقالوا لى هات جورج وتعالى، وقابلنا الدكتور وقالى أن جورج جاء فى الوقت المناسب واتكلم معايا بصراحة عن حالة ابنى وطمنى، بس قال لى لازم أنت وجورج تكونوا صبورين لأن رحلة العلاج هاتكون طويلة بس الأمل فى ربنا كبير إن شاء الله، وبدأنا رحلة العلاج بعد ما عملوا له كل الأشعات والتحاليل تانى.
تجربتى مع ابنى فى 57357 رحلة طويلة عدت على خير، والحمد لله ولو أقدر كنت كل يوم أشكرهم واحد واحد على اللى عملوه معانا من رعاية وعلاج ومراعاة لحالتنا النفسية ومتابعة لحالة ابنى.
الناس فى 57357 دكاترة وتمريض بيتعاملوا معانا بمنتهى الإنسانية قبل المهنية خاصة وقت عملية جورج كنت خايف جدًا على ابنى خاصة لما عرفت أنهم ممكن يضطروا يستأصلوا كليته مع الورم ، كنت منهار وخايف، ولكن الدكتور قبل الدخول للعمليات طمنى وقالى “إحنا بنعمل كل جهدنا علشان مصلحة جورج، وكانت فرحتى ما تتوصفش لما خرجلى من العملية، وقالى الحمدلله الورم إتشال وما احتجناش نشيل الكلية وجورج حالته ممتازة واحنا معاه وجنبه ما تقلقش عليه”،
بصراحة دول ملايكة مش دكاترة وتمريض وعاملين، ربنا يحفظهم ويجازيهم خير جميعًا.
البلد بتمر اليومين دول بأزمة بسبب فيرس كورونا، وسمعت إن المستشفى عندها أزمة فى أكياس الدم لأن مافيش ناس كتير بتروح تتبرع، علشان كدا رحت اتبرعت بالدم وأخدت صديق ليا معايا علشان نتبرع وكمان باتبرع بالمال باللى أقدر عليه علشان أساهم فى رحلة علاج الأطفال بالمستشفى لأن 57357 مكان يستحق التبرع، وباقول لكل الناس تعالوا شوفوا المستشفى بتوفر أحسن رعاية صحية بمستوى عالمى لكل الأطفال وبالمجان بمساواة ورحمة ولولاهم مش عارف جورج كان هايعمل إيه.
باحب عم كروان
و عن المستشفى وأحلامه فى المستقبل حدثنا جورج : “أنا بحب 57357 قوى علشان ليا فيها أصحاب كتير خاصة عمو كروان وميس سمر وميس أمانى بحبهم جدا علشان باروح ألون وأرسم هناك معاهم ولما كنت فى أوضتى كانوا بييجوا لى كل يوم يزورونى ويرسموا ويلونوا معايا وكمان مستر محمد علام من تمريض زرع النخاع، كان بيهون عيا الوقت جدًا، وأنا باخد علاجى، بادعى ربنا يشفى كل أصحابى فى المستشفى، وعن أمنياته قال جورج : “الحقيقة أنا متردد أطلع مهندس والا طيار بس اليومين دول اقتنعت أكتر إنى أطلع طيار”.
الحمد لله على سلامتك يا جورج وبنتمنى الشفاء لكل أطفال 57357 وكل سنة وأنت وكل إخواتنا الأقباط وكل المصريين بخير بمناسبة الأعياد.
بدعمكم جورج وكتير زيه انتصروا على السرطان وحققوا حلم الشفاء والحمد لله، خليك سبب فى شفاء طفل بتبرعك لدعم رحلة علاج أطفال 57357