عمر من أبطال 57357 فرع طنطا، دخل المستشفى فى 2016، مصابًا بسرطان الغدد الليمفاوية، واستمرت رحلة تلقى العلاج حتى فبراير 2017، أنهى خلالها جلسات الكيماوى والإشعاعى، وبفضل الله بدأ فترة المتابعة، وأصبح أيضًا بطلًا متفوقًا فى الثانوية العامة للعام الدراسى 2019/2020 .
“لا استسلام إلا بتحقيق أملى”، عبارة كتبها عمر أمامه خلال العام الدراسى فى الثانوية العامة:
تحدثنا مع عمر عن رحلته فى 57357 – طنطا، وعن تفوقه فى الثانوية العامة هذا العام وحصوله على مجموع 98% علمى علوم، قال: “دخلت المستشفى وكنت فاكر إن مافيش أمل، ولكنى اتعلمت فى ٥٧٣٥٧ أن التمسك بالأمل يحقق المستحيل.
أثناء جلسات الكيماوى التى كانت أكثر شىء مؤلمًا بالنسبة لى فى رحلة علاجى، كانت معاملة التمريض والدكاترة تريحنى نفسيًا وتعطينى الأمل والاطمئنان، وبسببهم حالتى المعنوية ارتفعت، فزادت استجابتى للعلاج واتحسنت بسرعة. والحمد لله من يومها تعلمت أنه مافيش مستحيل، ولما دخلت ثانوية عامة قلت زى ما بفضل ربنا انتصرت على السرطان هاتمسك بأملى فى التفوق فى الثانوية العامة، وفعلًا كنت بأبذل كل جهدى والحمد لله ربنا ساعدنى وكانت نتيجة تعبى خير.
كلية طب أسنان
وعن أمنيته قال عمر: أثناء فترة علاجى فى المستشفى كنت اتابع أسنانى فى 57357 فى القاهرة، وشوفت دكتور الأسنان والأجهزة الحديثة التى بيستخدمها وعجبنى جدًا طريقة شغلهم واتمنيت أكون زيهم، واعمل طبيب أسنان فى 57357 وأعالج الأطفال وأهتم بصحتهم زى ما أهتموا بيا .. باتمنى أدخل طب أسنان وأحقق حلمى، مش عارف من غير 57357 كنت هاعمل إيه، أعطونى الأمل وشجعونى أحقق أول حلم من أحلامى
ألف مبروك لعمر و للـ 6 أبطال من 57357 – فرع طنطا نجاحهم فى الثانوية العامة: نيرمين فرج 92%، نهال يوسف 90%، سلمى عبدالحليم 87%، دينا عبدالحميد 84%، إيناس فوزى 72.8%، فاطمة أحمد 60%، ومبروك لكل الأبطال اللى نجحوا من 57357 بالقاهرة، فرحتونا وكلنا فخر أنكم من أبناء 57357.