عام قارب على الانتهاء وآخر على وشك البداية، ومافيش أجمل من رسالة، كتبت كلماتها بطلة من 57357، تتحدى سرطان الدم بمنتهى القوة والإيمان، بأن المستقبل الجميل قريب بإذن الله .. بسملة فى الفرقة الأولى كلية تربية، قسم علم نفس، من الشرقية، دخلت 57357 فى مارس 2021، ومازالت تتلقى جرعات العلاج، كتبت رسالة لكل بطل فى 57357، وكل قلب وسند وقف جنبها .
كتبت بسملة: “باقول لكل طفل فى 57357 إوعى تخلى حاجة تهزمك .. والابتلاء اللى إحنا فيه إن شاء الله هايخلص وهانطلع منه أقوياء مش ضعفاء أبدًا .. مش بس علشان مشوار علاجنا لكن فى كل حاجة .. إوعى تزعل لأن حتى الأيام الصعبة هاتعرفك قد إيه اللى حواليك بيحبوك .. وصبرك وتحملك هايخلوك أقوى من أى حد .. وهيكون اسمك بطل حتى فى حياتك الشخصية لأنك قدرت تتخطى كل الصعوبات .. أنت بطل قصتك وقدوة لغيرك .. أنا كنت خايفة فى الأول .. لكن فى 57357 علمونى أبقى شجاعة وأن كل حاجة ليها حلوأنى لو صدقت إنى قوية هانتصر على المرض .. حافظ على الطاقة الإيجابية والأمل جواك علشان تكمل وتنتصر على السرطان .. وإدعى ربنا يشفينا كلنا .. ولكل واحد وقف جنبنا وزارنا .. شكرًا لأنك كنت سندُا لينا .. كل سنة وأنتم طيبين .. وربنا يجعلها سنة سعيدة عليكم وأحلى من السنين اللى قبلها”.
ربنا يشفيكى يا بسملة، ويشفى كل أطفالنا فى 57357، والسنة الجديدة تهل بالخير والفرح عليكم وعلى كل القلوب اللى بتسندكم فى رحلة شفائكم .. سنة جديدة سعيدة من 57357 على الجميع.