كل عام وأنتم بخير وصحة وسعادة
السنة دى هنحتفل بمرور 15 سنة على افتتاح 57357
15 سنة جهد وتعب وتحدى لكل الظروف، والحمد لله، قدرنا بفضل الله، وبجهدكم وإخلاصكم، نحافظ على نجاح 57357، ونحقق إنجازات مستمرة، ونعالج آلاف الأطفال، ونرفع نسب الشفاء، ورغم كل الظروف الصعبة اللى واجهناها، ولسه بنواجهها، واللى أثرت بصورة كبيرة على التبرعات، قدرنا نحافظ لولادنا على نفس مستوى الجودة والتميز فى الخدمة الطبية، وهنفضل بمساندة كل المتبرعين، اللى دايمًا واقفين ورانا، وبجهد كل العاملين وإخلاصهم، وقبل كل ده، ببركة ربنا، محافظين على نجاحنا وتميزنا.
إنجازات 15 سنة:
- بدأنا بـ١٨٠ سريرًا، ووصلنا إلى ٣٨٠ سريرًا، بالإضافة إلى 200 كرسى علاجى لعلاج اليوم الواحد.
- فتحنا تخصصات طبية جديدة، وطورناها، مثل: الصيدلة الإكلينيكية، والتغذية العلاجية، وباثولوجيا الأورام، وطورنا المعامل، وبنك الدم، وفتحنا وحدات بحثية جديدة، مثل وحدة الأبحاث الجينية، وأبحاث بيولوجيا الأورام، وأبحاث البروتينات، وأبحاث المناعة.
انجازات العام الماضى:
- تجديد اعتماد 57357 للمرة الثالثة على التوالى من اللجنة الدولية المشتركة لاعتماد المنشآت الصحية JCI.
- اعتماد الجمعية الأمريكية لصيادلة النظام الصحى (ASHP)، وفقًا لمعايير نظام صيدليات النظام الصحى والمستشفيات الدولية.
- تجديد اعتماد وحدة التعليم المستمر للتمريض بمستشفى 57357، للمرة الرابعة على التوالى، كوحدة للتطوير المهنى المستمر، من قبل مركز اعتماد التمريض الأمريكى.
- شهد العام الماضى أعلى معدل لنشر الأبحاث العلمية، حيث تم نشر 84 ورقة بحثية بالتعاون مع جامعات مصرية وعالمية فى مجلات علمية عالمية.
- تجديد مضخات المستشفى بالكامل (شراء 680 مضخة).
- تجديد 150 سريرًا من الأدوار الداخلية والرعايات وزرع النخاع (المستشفى الرئيسى).
- تجديد 45 سريرًا بفرع طنطا.
- استلام مبنى السايبر نايف، وجارٍ تركيب ومعايرة وتشغيل الجهاز.
- استلام وتشغيل مبنى العلاج بالفن.
- إضافة ماكينة فرم وتعقيم جديدة للمستشفى.
- جارٍ انهاء الأعمال فى تجديد حديقة المستشفى وعمل لاند سكيب جديد.
- جارٍ إنجاز مشروع رفع القدرة الكهربائية للمستشفى من 4500 ك.ف. أ ، إلى 6100 ك.ف.أ، وإضافة محول جديد للمستشفى.
ولسه أحلامنا كتير:
- عايزين نوصل بنسبة الشفاء للنسب العالمية.
- عايزين نحافظ على الجودة والريادة والتطوير المستمر فى الخدمة الطبية، مهما كانت الظروف، وده اللى بيميزنا وملتزمين به على مدى 15 سنة.
- عايزين نقدم أبحاثًا علمية جديدة، تُساهم فى كشف أسرار السرطان، واكتشاف أساليب علاجية جديدة، وعايزين نهتم بالأبحاث العلمية التى تُقدم حلولًا جديدة لمشكلات المجتمع.
كل سنة وكلنا طيبين
وكل سنة واحنا بيكم ومعاكم، بإذن الله، بنضيف نجاح جديد لنجاحنا.