محمود بطل من 57357 يتحدى السرطان للمرة الثانية ويستعد لزرع النخاع

    بطلنا محمود، عنده 9 سنوات، من محافظة البحيرة، أصيب بسرطان الدم، ودخل 57357 منذ 5 سنوات،أكمل علاجه وبدأ مرحلة المتابعة..

بطلنا محمود، عنده 9 سنوات، من محافظة البحيرة، أصيب بسرطان الدم، ودخل 57357 منذ 5 سنوات،أكمل علاجه وبدأ مرحلة المتابعة،ولكن ارتد عليه المرض مرة أخرى منذ شهر يونيو 2022، طبيبه الاستشارى د. هشام منيب، قرر عمل زرع نخاع لمحمود، وهو الآن يتلقى جرعات كيماوى،استعدادًا لعملية الزرع، وشقيقه عمره عشرة أشهر سيكون المتبرع له.
تقول والدة محمود: “ابنى تعب كتير فى أول مرة دخلنا المستشفى، كانت الصدمة لينا وله، والألم خلاه مش قادر يمشى، ولكن بفضل ربنا والرعاية والعلاج حالته اتحسنت وبقى أحسن، ولما خلص جرعاته والدكتور قرر أنه فى فترة متابعة،كنت فرحانة وباقول الحمدلله، وحتى بعد لما ارتد عليه المرض برضو باقول الحمدلله، إن فيه مكان زى 57357 بيفضل فى ضهر ولادنا يعالجهم، ويكمل معاهم لو أى حاجة تانى حصلت لهم، والحمدلله إن أخوه الصغير (عشر شهور) طلع متوافق معاه بنسبة 100%،وهايتبرع له بالنخاع الشوكى”.
محمود شخصيته هادية، وكريم جدًا، وبالرغم من أنه له أخوات أكبر منه، لكنه بيحب دايمًا يجيب لهم هدايا وحلويات من مصروفه، ولما بنكون فى الشارع، ويلاقى حد غلبان، يجرى عليه ويتصدق باللى معاه من مصروفه، ولما بنكون فى المستشفى دايمًا يتبرع من مصروفه، ويقولى علشان أساعد المستشفى علشان أنا وأصحابى ربنا يشفينا”.

وتحدثنا مع محمود قال: “أنا أكثر حاجة بحبها قراءة القرآن والصلاة،وباستنى رمضان علشان أقعد مع إخواتى فى البيت، ونلعب بالفوانيس، بتبقى أوقات حلوة وبحبها، لكن السنة دى هاقضى رمضان فى 5757 علشان العملية،أنا بادعى ربنا يشفينى أنا وكل الأطفال اللى زيى فى 57357، وإن شاء الله هاطلع دكتور وهافتح عيادة وأول حاجة هاعملها هاتبرع من فلوس شغلى لـ57357، علشان يخففوا أطفال كتير، أدعولى ربنا يقوينى، وأنتصر على السرطان المرة دى كمان”.

ربنا يشفيك يا محمود، ويشفى كل مريض، وكل أطفال 57357، دعمك لمحمود ولأطفال زيه كتير منتظرين زرع النخاع بأمل جديد فى الشفاء من السرطان هايساعدهم يكملوا علاجهم، ويشفوا من السرطان بإذن الله، نسبة الشفاء الآن فى 57357، 71.7% بمساعدتكم هاتزيد وهايحقق أطفال أكتر الانتصار على السرطان.