والدة رزان: 120 جلسة كيماوى لعلاج رزان وسرعة التعامل فى قسم الطوارئ أنقذت حياتها
رزان بنتى عمرها 10 سنين، قضت أكثر من سنة ونصف السنة فى العلاج فى 57357، ولسه علاجها هيستمر سنة ونص كمان، رزان عندها لوكيميا، وعلاجها 120 جلسة كيماوى، يعنى حوالى 3 سنين، رحلة طويلة وصعبة، والأطفال بيتعرضوا فيها لأزمات كتير بسبب مضاعفات المرض والعلاج ونقص المناعة، ووحدة الطوارئ هى اللى دايمًا بتنقذ ولادنا من أى أزمة بيتعرضوا لها.
رزان مع بداية جلسات الكيماوى اتحسنت، لكن فى الأسبوع الـ19، اتعرضت فجأة لتشنجات ورعشة وحرارة شديدة، جرينا بها على الطوارئ فى 57357،
الحالة كانت خطيرة، لكن فى الطوارئ بيتعاملوا مع الحالات بمنتهى الاهتمام والسرعة، عملوا لها تنفس صناعى، ومضاد تشنجات، وبعدين حولوها للرعاية، وعرضوها على الاستشاريين، واتعمل لها أشعة مقطعية على المخ، وخلال ساعات اكتشفوا أن رزان عندها خراج فطرى فى المخ، بيهدد حياتها، وفى نفس اليوم اتحولت للجراحة، وتمت إزالة الخراج بنجاح، وحالتها اتحسنت جدًا، لكن كان لازم لها علاج غالى لمدة 6 شهور، سعر العلبة حوالى 20 ألف جنيه، لكن المستشفى مبتبخلش على ولادها، ووفرت لها العلاج بالكامل، وأنقذوا حياتها والحمد لله.
بعد علاج الخراج، رزان رجعت تانى تكمل جلسات الكيماوى، ووصلنا للجلسة الـ 60، ولسه فاضل 60 جلسة زيهم، تكاليف علاج اللوكيميا رهيبة، وفيه حالات كتير عندها لوكيميا زى رزان، لكن المستشفى بتتحمل تكاليف العلاج بالكامل لكل الحالات، وأنا وكل الأمهات فى المستشفى أملنا كبير فى شفا ولادنا، وبندعى ربنا يعين 57357 على حملها الكبير.
د. أحمد عماد، رئيس وحدة الطوارئ، بيأكد أن حالات الطوارئ حالات حرجة وخطيرة، و57357 حريصة على توفير كل الإمكانيات فى الوحدة، لأن سرعة اتخاذ القرار فى الطوارئ، بيقلل نسب الوفيات، ويقلل نسب الحجز بالرعاية المركزة، وكمان بيقلل مدة حجز المريض داخل المستشفى، وفى حالة رزان تم التعامل مع الحالة بسرعة وإزالة الخراج فى نفس يوم دخولها، وبعد الجراحة كان لابد من مراعاة التوازن بين علاج اللوكيميا وعلاج الفطر لمدة 6 شهور، حتى تم الشفاء التام والحمد لله، ورجعت رزان تواصل جلسات الكيماوى، وحالتها بتتحسن كل يوم.
علشان نقدر نستمر فى تقديم الخدمة المميزة لولادنا فى قسم الطوارئ، وخاصة مع زيادة العدد اللى بيتردد عليه من أطفال المستشفى، واللى بيوصل لأكثر من 2000 مريض شهريا، كان لازم نطور القسم ونوسعه، وبدأنا فعلا مشروع التوسع والتطوير، وربنا يقدرنا على إنجازه.
اتبرع لتطوير قسم الطوارئ.. وساهم معانا فى إنقاذ حياة طفل من أطفال 57357 .