الرجوع الى صفحة التبرعات

والدة سمير:

أول ما عرفنا من الدكاترة فى بنى سويف، إن سمير عنده ورم فى المخ، وهيحتاج جراحة وعلاج طويل ، كانت صدمتنا كبيرة، وكان كل همّنا ، إزاى هنقدر نوفر تكاليف الجراحة والعلاج ، لكن واحد من الدكاترة نصحنا نروح مستشفى 57357 ، والحمد لله سمير بدأ رحلة علاجه من شهر، ومن أول يوم كانت المستشفى بتقدم له علاج على أعلى مستوى ،وكمان إقامة كاملة ووجبات ورعاية صحية ونفسية ، وكل ده مجانا تماما ، الأهل مبيتحملوش أى فواتير ، وكل تكاليف العلاج الضخمة بتعتمد على تبرعات أهل الخير.

وتكمل الأم :

احنا صعايدة من بنى سويف، زوجى محار ، وسمير (17 سنة)،هو ابنى الوحيد على3 بنات ، مش ممكن ننسى اليوم اللى تعب فيه فجأة، كان فى بيت عمته بيلعب مع ولادها، وصحينا الصبح على صراخها فى التليفون :

“الحقوا سمير، بيصرخ من الصداع ، وبيرجّع، وغاب عن الوعى”

وتكمل الأم:

فى مستشفى بنى سويف ، اكتشفوا وجود مياه على المخ، وأجروا له جراحة لتركيب صمام، وبعدها عرضناه على طبيب متخصص أكد وجود ورم فى المخ، وحاجته لإجراء جراحة وعلاج طويل.

كان أول ما فكرنا فيه، إزاى هنوفر تكاليف العلاج الكبيرة ، لكن الطبيب نصحنا بالتوجه فورا لمستشفى 57357 .وقتها كانت فترة أعياد الميلاد ، قضينا عيدا حزينا فى البيت ، وبعد العيد مباشرة ، ذهبنا للمستشفى، سمير كان خايف ورافض يتقبل المرض، لكن من اللحظة الأولى كان الاهتمام غير عادى بحالته الصحية والنفسية ، كل العاملين كانوا بيدعموه ويشجعوه، وبمجرد دخوله ، أجروا له كل الفحوص علشان يشخصوا حالته ، وبعد التحاليل المعملية والقياسات، وأشعات الرنين والأشعة المقطعية، تم تشخيص حالته ، بورم، من أنواع الأورام النادرة ، ويحتاج جراحة وكيماوى واشعاعى، لكن عرفنا ان الحمد لله كل ده بيتم بفلوس التبرعات، وإن المريض مبيتحملش أى فاتورة، والحمد لله سمير بدأ العلاج ، وأجرى جراحة دقيقة ناجحة استمرت 7 ساعات ، تم خلالها إزالة الورم بنجاح والحمد لله.
وربنا يكرم كل العاملين فى 57357 اللى واقفين جنبه من يوم دخوله ، ويكرم كل المتبرعين اللى بيساهموا بتبرعاتهم فى نفقات علاج سمير، وغيره من المرضى .

اورام الضفيرة المشيمية:

هى نوع نادر من أورام المخ توجد فى البطين الذى يفرز سائل النخاع الشوكى ، ويؤدي إِلى انسداد مجرى السائل وتراكمه (الاستسقاء الدماغي) ، مما يسبب الصداع العنيف والانفعال العصبي والغثيان أو القيء.

علاج سمير بدأ بالجراحة ، ويتبعها العلاج الكيميائي والعلاج الإشعاعي .

• رحلة العلاج طويلة، لكن سمير بيحلم بالشفاء ، وبالرجوع لمدرسته وأصحابه ولعب الكرة والتدريب فى الجيم، سمير بيحلم برجوعه للحياه
• ووسط دموعها ، تقول الأم: احنا لسة عايشين الصدمة، لكن أملنا فى ربنا كبير انه ينجيه وترجع له ضحكته وترجع لنا حياتنا.
• فى 57357 ، هدفنا مش بس نعالج ولادنا، لكن كمان نساعدهم يخرجوا من محنة المرض أقوى ، ويرجعوا لأهلهم وحياتهم ، ومستقبلهم.

انت كمان ..ممكن تشارك ..وتسعد سمير واهله وترجع لهم فرحتهم..

مد إيديك معانا ، علشان تسعد طفل مريض، وتسعد قلوب أهالى كتير بيحلموا لولادهم بالشفا .