لمار، بطلة من أبطال 57357، وراء ضحكتها الجميلة، تحدٍ كبير للمرض، وصبر وأمل فى الشفاء، بطلتنا عمرها 9 سنوات، دخلت 57357 فى 2018، وتم تشخيصها بالإصابة بورم فى المخ، أفقدها القدرة على الرؤية، ونظرًا لدقة مكان الورم، لم يتم عمل عملية لاستئصاله، وخضعت لمار للعلاج الكيماوى والإشعاعى لمدة عامين، وتحسنت حالتها ورجعت تشوف، وانهت كل جرعاتها، ولكن شاء الله، أن يرتد المرض مرة أخرى منذ 5 شهور، وبدأت بطلتنا رحلة علاجها الثانية، التى أنهت منها 5 جرعات كيماوى فى انتظار أن يتم عمل زرع نخاع لها، وبالرغم من التحدى الكبير الذى تخوضه لمار مع السرطان، فإن ضحكتها الجميلة لا تفارق وجهها، وأملها كبير أنها تشفى بإذن الله.
تقول والدة لمار: “لم أكن أتوقع كل الاهتمام والرعاية اللى شفناها فى 57357، أصعب حاجة عجز الأم أو الأب عن مساعدة طفلهم، لأن العلاج غالى جدًا جدًا، ولكن لما تكون فيه مستشفى زى 57357 بتشيل الحمل التقيل بتاع علاج ولادنا، وبتقدمه ليهم بالمجان، يبقى المستشفى دى رحمة من ربنا لينا كلنا، المكان مش بس بيعالج ولادنا لكنه بيتطور كل يوم، باقول لكل الناس إن أى تبرع أو مساعدة فعلًا بتفرق فى حياة ولادنا وبتساعدهم يقفوا على رجليهم”.
وتحدثنا مع بطلتنا لمار، وقالت: “أنا بحب المستشفى علشان بارسم وألون، وبيخلونى أشارك فى المسرحيات، وأغنى معاهم فى الورشة، وكلهم هنا بيحبونى قوى، وأنا كمان ماقدرش ألعب أى حاجة من غير أصحابى اللى فى 57357، نفسى لما أكبر أبقى دكتورة أعالج الحيوانات، أصل أنا بحب القطط قوى، ونفسى لما يتعبوا أعالجهم كلهم ويخفوا”. خليك سند لبطلتنا الجميلة لمار وغيرها كتير من أبطال 57357 اللى بيتحدوا سرطان المخ، دعمك هايساعدهم يحققوا حلمهم فى الشفاء من السرطان.